أنمار بيت المال

رأيي عن فلسطين

..
في الوقت الحالي
رأيي أن المسلمين عليهم العمل على أن يصلحوا من أحوالهم
لأنو ربنا محا يصلحنا إلا إذا إحنا عملنا كدا
همنا الأكبر ( الآن ) هو أنفسنا
إنها تتقي ربنا
قبل ما نخرج للدعوة
و التأليف و الإفتاء من غير علم

..
بعد ما ننتهي من أنفسنا كمسلمين كفؤ
نبدأ نصلح من حولنا
و نوقف أكبر جرائم الدنيا
و هيّا الحرب
و الظلم
و خاصةً فلسطين
و أي بلد مسلم تحت ظلم عدو
مالو قيمة

..
عندي هرجة تانية
موضوع الإستشهاد
أو ما يسمى بالعمليات الإستشهادية
غير الهجمات على بلاد الكفار زي أحداث سبتمبر ( الموضوع شبيه و لكنه مختلف عن إللي أتكلم عنّو )
بصراحة ما أبغى أتمعمع في الموضوع كتير و لكن عندي رأي صغير فيه
ممكن أكون غلطان ( حطّو في بالكم )
في رأيي هادي العمليات ليست بشيء غريب أو عجيب
ماني شايف أي مانع يمنع أهل فلسطين يسووها
أكيد ماني مقتنع إنها صح
لكن ما كإنو فلسطين ليها أكتر من خمسين سنة تحت الإحتلال؟
ستين سنة كمان
يعني في ناس أعمارهم خمسين و ستين سنة يشوفو صواريخ طايرة من فوقهم و من تحتهم
و كتير منهم خسرو كتير من حبايبهم
يعني خلينا نتخيل أنفسنا ( إحنا المرفهين ) كل يوم على الصبح كدا
بدل ما نصحى على أدان الفجر, نصحى على أدان الدبابات و تغريد الرشاشات
بالله عليكم مو دمار دماغي؟
ما كإنو الوضع مو طبيعي بالنسبالنا؟

..
أكيد أكيد أكيد أكيد أكيد تفجير البني آدم لنفسو شيء خاطئ مية في المية
و لكن بني آدم ما عمرو راح مدرسة
و إن راح ما فيها شي حيفيدو
و كل يوم يشوف دمار في دمار
ما يعرف لا دين ولا رياضيات ولا تاريخ ولا علوم ولا إملاء حتى
كل إللي يعرفو إنو الأمريكان همّا العدو الأول و الأخير و مافي غيرو
إيش حيسوي غير إنو يفجر نفسو في وسط اليهود و الأعداء
ما يعرف إيش الصح من الغلط
من فين حيعرف إنو الإيمان بالله و الصبر هوّا إللي حينصرو؟
من فين حيعرف إنو الله سبحانه و تعالى هوّا إللي حينقذو؟

..
أكيد البعض حيقول ( لأ, الفلسطينيين يعرفو الدين و يعرفو يصلو و يعرفو ربنا أحسن مننا )
أنا أختلف مع هادي المعلومة الضعيفة
فكرو في الموضوع
إحنا عندنا مشايخ يدرسو في الدين أربعة و عشرين ساعة
في القرآن و السنة
يدرسوا و يدونا إيه هوا حكم تفجير النفس في الإسلام
و عندنا كتب و أدلة في كل المكتبات نقدر بنفسنا نقراها و نستفيد و نتعلم
نعرف إيش هوا الحلال و الحرام
و عندنا مدارس و كتب مدرسة و معلمين ( بغض النظر عن ضعف التعليم, دا يبغالو موضوع بحالو )
و عندنا فلوس
أهل
بيوت
تربية
تلفزيونات من المقاس الإلهي
جوالات
إعلام
وسائل إتصال من كل النواحي
بسرعات مختلفة
عندنا كل شي
و همّا ما عندهم غير صواريخ رايحة و جاية
ولد عمي مات
ولد خالتي أنفقع
ولدي أنتحر
أختي أندفنت
زوجتي مات ولدها في بطنها
أبويا أتشل
و إنتا ماشي
على مدى الحياة قصص موت و دبح و تفجير و تدمير

(( و مستغربين منهم ينتحروا؟؟؟؟ ))

..
أنا أكره سياسة اليوم
ولا أبغى أفكر فيها
لأنها محبطة
لكني عارف و متأكد إنو النصر قريب
و النصر في أيادينا
مهما كان أو حصل
المسلمين منتصرين في النهاية

..
الموضوع ما كنت عارف كيف أكتبو
و ما زلت خايف أكون غلطان في أي حاجة
فقررت أطلعو بزي ما هوّا في عقلي
و أمري لله
إن قلت شي صح فخدو بيه
و إن قلت شي غلط فصححوني الله يخليكم
أنا زي ما أقول دايمًا ماني داعية و لاني شيخ ولا أي حاجة غير إني بني آدم صاحب رأي
و رأيي يحتمل الخطأ و الصواب

السلام عليكم و رحمة الله و بركاته