أنمار بيت المال

اسمع

يا أهل جدة

إللي محتاج حاجة من محل معين

يطلب عن طريق الإنترنت

و ما يحتاج يروح بنفسو

أدعو للشباب العاملين على المشروع بالنجاح و ساعدوهم عن طريق الطلب لبيوتكم

مبروك علينا الخدمة

مِن ذَهَب

لازم تعجبكم

و أعطوني آرائكم

السلام عليكم و رحمة الله و بركاته

إن شاء الله تعجبكم

و نكسب كلنا الأجر

..
تصدقوا يا أحبتي في الله

اللهم صلي على سيدنا محمد و على آله و صحبه أجمعين
صلى الله عليه و سلم

في كم حاجة من صغري و أنا ألاحظها
لدرجة إني كنت أصدقها و أخاف منها

التنبيه عن التدخين في المدرسة
بعض المدرسين لمن يبغى ينبه الطلاب من الأشياء زي الدخان
يخوفنا منها
فيقعد يقول مضار التدخين
السرطان و أمراض القلب و ما إلى ذلك

الأمر معتاد
و طبيعي
( ما في مشكلة )
يعني ما عندي أي إعتراض على التوضيح و التذكير
بس الحاجة إللي كانت تقرفني من هادول الناس هيّا لمن يبدأو يألفو
و يقولو حاجات زي:

1- الدخان يعكر المزاج
2- متعة التدخين هي مجرد تخيلات و تهيئات
3- المدخن دايمًا يكون من حثالة المجتمع
4- مافي مدخن إلا و يسكر
5- المدخن نهايتو المخدرات ( لا محالة )

نمسكهم حبة حبة

واحد ..
من أكتر المهدئات فعالية هي التدخين
أغلب المجرمين في السجون يطلبو سجاير وقت التحقيق ( إيوة, مو بس في الأفلام )
السيجار من يوميات عدد كبير من الدكاترة ( الأكاديميين )

إتنين ..
خليني أكون صريح معاكم
أنا ما عمري دخنت في حياتي
ما أعرف إذا كان لمن أحط السجارة في فمي من غير ما أولعها برضو مضر ولاّ لأ
و لكن ما عمري ولعت سجارة و كحكحت ساعتين, و تلاتة دقايق, و أربعة و خمسين ثانية, و خلصتها
بالعربي, ما عمري جربت الإحساس الرهيب إللي (( كل )) المدخنين يتكلمو عنو
كل المدخنين مزاجهم يروق مع الدخان ( على كلام كل المدخنين إللي أعرفهم, و أنا أعرف كتييييييييير )
و أكتر من سبعين مرة أسمع مدخن يقول:
أووووووه, دحين سجارة و قارورة ماونت ديو بعد الأكل! كلاااااااااااااااااااااااام
ألم
يجي
يا لطيف
بس أنا ماني فاضيلكم ترا, أبغا أروح أشبّلّي سجارة دحين و أستمخ كدا و روقاااااااان
(كلامي صحيح ولاّ لأ؟)
التدخين ممتع
و مفيد
لا محالة
كل ما في الأمر إنّو أيضًا مضر
و من الواضح إنو ضررو أكتر من فايدتو

تلاتة ..
هل يعقل أن يكون أكتر من ستين في المية من المجتمع مجرد ( حثالة ) ؟
ما أظن
الخير موجود
و أهل الخير موجودين
بالذات في أرضنا
كتير مدخنين أكتر منّي إيمانًا بالله
كتير منهم من الطبقة ( العامة ) العايدية
ما يبغو غير الخير
و لكن ربنا أبتلاهم بالدخان
و فيهم من المميزين
فالمعلومة خاطئة
ليس كل المدخنين بحثالة ( و ليس بشرط )

أربعة ..
ياما ناس بدأو تدخين من أعمار صغيرة جدًا
و ما عمرهم شربو غير الدخان
أغلبهم ماتو ( ما في خلاف )
أو بيعانو من سرطان ولا بلوة ( البعيد عنكم, الله يحفظنا و يستر علينا )
و لكن ما عمرهم قربو شرب ولا أي هبل تاني
فبرضو المعلومة دي خاطئة
المدخن مدخن
و السُّكُرجِي سُكُرجِي ( بالحركات المكّاوية )
الله يبعد السكار عن كل مخلوق ( قولو آمين )

خمسة ..
خمسة صحتها زي أربعة
الفرق إنّو بعض المدرسين كانو يأكدولنا إنّو أي مدخن ما حيرتاح إلا لمن يتقدم في الخراب
بحيث إنو يحتاج لزيادة المعايير بعد كل فترة و فترة إلى أن يصل إلى القمة ( قصدي القاع )

.
.

يا مدخنين
يا حبايبي
يا قلوبي المية و خمسين مليون ( و أكتر )

أطلب منكم مجرد التفكير
في رسولنا الكريم عليه أفضل الصلاة و التسليم
حيرضى يشوف أحفادو ( إحنا ) يضرو أنفسهم بنفسهم؟
بأياديـ ( نا ) ـهم
يضرو صحتهم
قلوبهم
شرايينهم
أولادهم
حبايبهم
الزرع و الحيوانات و الهوا و الفضاء الخارجي

يا مدخنين
يا حبايبي
يا قلوبي الميتين و ستين بليون ( و أكتر و أكتر )

فكرو في ربنا سبحانه و تعالى العلي العظيم
هل حيرضى نزعل رسوله الكريم
عليه الصلاة و السلام

..
أكدب عليكم لو أقول ترك التدخين سهل
كلنا عارفين دا الشي
مو لازم أنمار بيت المال إللي ما يدخن يجي يعلمنا
مسوّي فيها شيخ ( الأخ اللطيف )
طبعًا ماني شيخ و لا عالم
لكن ما أبغى أشوف أقرب الناس ليّا يموتو بسبب دخان
و كان ممكن يسيبوه من زمان
و الله و الله و الله .. واحد من أصحابي الأعزاء ( كان أفضل صديق ليّا ) أتوفى بسبب الدخان
مية في مية من الدخان
كنت في مدارس الثغر في جدة ( الخالدية )
أول ثنوي
في عمري
أفتكرو كان في المتوسطة يتفاخر علينا بالدخان حقو
كان يرص أربعة سجاير في فمو جنب بعضهم
و يخلصها في دقيقة, دقيقتين
بس عشان نقول أوووووه مرة خربان الواد دا
خلينا نروح نقول لفلان و علاّن عنو
صغار و فاضيين و طفشانين و نبغا حماس
من أي مكان
أي وقت
بأي شكل من الأشكال
و النتايج أغلبها زي ما قريتو

..
أحد قرايبي ( الله يكون معاه )
15 سنة
دوبو بدأ دخان
إحنا الشباب الكبار سألناه
من غير لا أمه و لا أبوه معاه ولاّ جنبه
متى حتوقف تدخين؟
جوابه بكل سهولة و إنسيابية:
ما عمري حأوقف
ولا حتى بيمزح أو بيتّريق
البني آدم من جدّو مو ناوي

..
أفتكر في مسجد سهل ياسين
قبل سنتين تقريبًا
في شهر رمضان
كانت في حملة أو ( نهضة ) ضد التدخين
أتوزعت على المصليين بروشورات
و كانت فيها إحصائيات عن الإرتفاع و الإنخفاض في نسب المدخنين
ما بين الغرب ( بالذات أمريكا )
و بين العرب ( إحتمال بس السعودية, ما أفتكر )
في أمريكا النسبة كانت فوق الستين
و نزلت تحت التلاتين في خلال العشرة أو العشرين السنة إللي فاتو
في السعودية ( أو العالم العربي زي ما قلت )
أرتفعت من الخمسين لفوق الستين أو السبعين ( في نفس الفترة الزمنية )
(( لا إله إلاّ الله ))
أول ما عرفت ما صدقت
لا حول و لا قوة إلا بالله

..
في النهاية أقتنعت
و بدأت أفكر في الأسباب
أكتشفت إنو أحد الأسباب هو أسلوب التوعية
و أساليب الأهالي في التربية و التنبيه عن التدخين
و المدرسين ( السابق ذكرهم, الله يهديهم و يصحّيهم من سباتهم )

*
بالتخويف
بالضرب
بالسب
بالتلعين يمين و شمال
لا أشوفك تدخلي البيت من اليوم و رايح
إنتا فيك و يخطيك
قليل أدب و ما تستحي
منحط و سافل
*

ما خفي كان أعظم
و اللستة تطووووووول
أما في أمريكا ( و غيرها )
مو بس الأهالي إللي يساعدوك
حتى أصحابك
مثال عن تجربة شخصية
صريح بكل معنى الكلمة
أنا كطبيعتي الدائمة مع الدخان
طلبت من أحد الصديقات في الجامعة سجارة أحطها في فمي أتلذذ بريحتها الحلوة قبل ما تتولع
كالعادة
( مزااااااج )
أستغربت منها لأنها سألتني إذا كنت أدخن ولا لأ؟
طبعًا جاوبت بـ ( لأ, ما أدخن )
فسألتني تاني عن سبب الرغبة؟
فشرحتلها وضعي مع الريحة الغرامية
ذهلت أنا برفضها للطلب
أظهرت أنا تعجبي
البنت قفلت الموضوع تمامًا
قلتلها ما عندي مشاكل, بس أحتاج سبب الرفض؟
فقالتي ما أبغى أكون سبب بدايتك للتدخين
(( الرهيب إنها هيّا تدخن ))

..
إيش رأيكم؟
منتو ملاحظين فرق الأساليب بين أهالينا و بين ( شباب الغرب )
الشباب …. مو الأهل
بعض أهاليهم يدفعو فلوس يدخلو أولادهم و بناتهم مراكز إعادة تأهيل و تربية صحية
سبحان الله

..
آخر حاجة
ما أزال أخاف من إنو الشيطان يضحك عليّا و أبدأ أدخن في يوم من الأيام
و لكن بإذن الله الشي دا ما عمرو حيحصل
أدعولي و أنا أدعيلكم برضو
اللهم سهّل للمدخنين و للمدخنات ترك عادة التدخين و اجعل تركه أجرًا في ميزان حسناتهم و حسناتهن يوم القيامة
اللهم ارفع عن المصابين بأمراض السرطان و أمراض القلوب مرضهم و كفّر عنهم خطاياهم و عافِ كل مرضى المسلمين
اللهم آمين يا أرحم الراحمين

السلام عليكم و رحمة الله و بركاته